終於等到，616263，終於等到64周年，你大陸再神通廣大，河蟹再橫行無忌，這下不能禁止網民鍵入「64」了吧？
我知我知，這只是網民阿Ｑ式精神勝利，可以突破網絡封鎖寫64，其實又有甚麼大不了？共產黨不會少一塊肉，人民也不會多了甚麼福利；不過，就像講粗口一樣，×你老母不代表真的要做你便宜老豆，但那一刻的惡氣盡消，還是很舒服的。有時和專制政權的鬥爭，就只是落得講粗口式的洩憤，打不過你，罵你總可以吧？
香港慶國慶，三代特首同堂，董曾梁，這其實是示威者一大福音；一次集齊三個印花，毋須四處頻撲，正宗冤有頭債有主。
首先劈頭當然要問董生。
董生董生，你當年提出建屋目標8萬5，到今日都仲未知究竟係你定梁振英嘅主意，OK你唔答無問題，但我地想知，你當年8萬5，今日你徒弟梁振英竟然變咗4萬7，呢十幾年香港的房屋需求竟然可以少咗一半咁神奇？董生，你會覺得係你當日計大咗條數？定係梁振英自己計縮數呢？仲有啊董生，梁振英民望仲低過你，但暫時唔見有咩腳痛，中央係咁力挺佢㖭，你會唔會覺得自己當日好唔抵呢？
曾生曾生，你做乜戴住副超出席典禮嘅？你係咪唔想見到湯顯明啊？你嗰時簽批文俾佢去雲南，你其實係咪等於批准埋佢去麗江㗎？如果佢順便去埋西雙版納玩水騎大笨象，你係咪都會批准㗎？因為西雙版納都係雲南一部份喎。你其實知唔知佢中途自己加插咗行程啊？你知唔知佢其實係去玩㗎？
梁生梁生，我唔係問你郊野公園搶地，我係想問，有份報紙話你「稍後將辭職」，其實，你會「稍後」到幾時啊？