全球最大經濟體系美國冇錢出糧，公務員被迫放無薪假，國家公園關門，郵政署違約，好肉酸！兩黨仲要拗幾耐冇人知，但換個角度睇，短期內退市的可能性進一步下降，對股市有利無害。
超人上周公佈分拆港燈，百佳仲傾緊賣，轉頭又傳話屈臣氏都想拆；另一邊廂，又去歐洲大舉收購，呢招全球資產乾坤大挪移，妙！香港背靠祖國，但發展空間有限；歐洲剛渡過債務危機，經濟重拾升軌，計值博率，點都係歐洲更勝一籌。長和系話：呢啲純粹商業決定，但坦白嗰句就係：你冇利用價值了！
7月初推介TCL通訊（2618），當時3.84元，昨日收5.01元，目標價已達，賺咗三成。今日再推，純粹睇圖，炒智能概念呢個theme冇變，目標上調至7.5元。
第二季，公司靠智能機翻身，季賺3,841萬銀，之後公佈的數據全面起錨：8月智能手機銷量達177萬台，按年增長175%，佔總銷量36%。
公司料未來數月，智能手機單月銷量將突破200萬部，並可能提升全年收入目標，夠炒。
另外，集團本月將於歐洲首推4G機，配合強國年底前發4G牌，明年將是集團的騰飛期。惠州新廠房上月投產，年產1.2億部電話，夠晒發展所需。股價如突破5.1元，是飛身撲入的好時機！
魏力
http://www.facebook.com/2012jason
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24