短線要睇實隻新環保能源（3989），噚日佢大成交旗形突破，有啲嘢！事實上，呢隻股質地唔錯，佢前身係叫恒寶利，做製衣嘅，2009年轉咗手，控股權輾轉落到北京市國資委所屬嘅超級大國企首創集團手上，兼轉型搞新能源。
經過幾年的整合，包括供股收齊手貨，又贖埋啲可換股債券（CB），基本上已經執到間公司乾乾淨淨，可以隨時做大注資。尤其是大股東首創擁有逾1,000億元嘅豐厚資產，喺全國36個城市，又擁有一籃子的環保相關項目，更重要嘅係首創已表明新環保能源會係佢哋喺新能源業務嘅上市旗艦，所以趁佢有勢可追。
成功破旗 目標0.5元
查實，大股東首創手貨都唔平，佢第一手貨係喺2011年3月，以每股0.4元認購咗新環保能源兩億股新股。到今年6月，公司大比例供股，以每股0.2元，2供3，配售27.93億股，而呢次供股係由大股東首創包銷，供完之後，首創最新持有新環保能源48.68%。雖然首創最後呢手大貨每股成本係0.2元，但佢唔會沽嘛，所以現水平買入係好值博。
供完股之後，公司又即刻贖埋啲CB，一乾乾淨淨之後，即刻搞收購，先喺8月，收購惠州市區生活垃圾焚燒發電項目惠州廣惠能源，跟手9月，收購江蘇蘇北廢舊汽車家電拆解再生利用公司股權55%，代價1.19億元，個收購市盈率唔錯喎，約5倍水平。
不過，大家唔好當佢係剛轉型股，其實公司早喺2009年收購咗好多垃圾發電項目，2009年9月以11.55億元收購Smart View全部股權，其主要於中國北京、上海、南昌、廣州、南京及深圳從事垃圾發電項目。2012年8月，再收購都勻市科林環保及甕安縣科林環保全部權益，擁有兩個垃圾發電廠。再加埋最新嗰兩項收購，佢𠵱家嘅總項目量已增至10個，離收成期好近。
唔計佢最新嗰兩個收購，之前嗰8個廢物處理項目，設計規模為年約200萬噸，每年可產生上網電量約3.77億千瓦時，個規模大約係光大國際（257）垃圾發電項目規模嘅三分之一，但光國𠵱家個市值係超過270億元，而新環保能源只得17億元市值，如以光國市值嘅三分之一作目標，起碼睇1.93元啦！唔好唔記得首創嘅地位同光大唔會差好遠，咁首創點會咁失威呀！
記住1.93元個價都仲未計注資效應。如果計埋注資，起碼睇幾蚊，即係等於當年嘅光國咁，由幾毫子起步，砌到𠵱家嘅6、7元水平。
總言之，新環保能源作為首創嘅上市旗艦，長線以幾百億市值做目標好合理，正所謂好股識於微時，趁佢𠵱家仲係低位先買一手做貨底長擺，等佢變第二雙光國。至於短線方面，由於佢剛大成交破旗形，短線量度升幅應可見0.58元，短線潛在升幅55%。
陳承龍
本欄逢周四刊登
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24