曾鈺成日前談及香港管治危機，他說：「（香港）點樣行落去可以一定成功我唔知，但行咗16年，邊啲嘢一定行唔通，好多人都睇到。」他認為北京把政黨排除在管治之外，全世界也未有成功的例子。曾鈺成坦言「不到中央抗拒」，將來落實普選後，特首候選人一定依靠政黨作選舉。他一針見血指中央過往想法太簡單，以為效法港英時代派一個人出任特首，有公務員支持就能管治。
北京唔信共產黨以外勢力
梁振英一年來在政治上嘅失敗，再次證明親共業餘政客，問題不在緊隨北京路線，立場保守，而在於欠缺專業政治訓練，連企出嚟面對公眾能力也欠奉，欠缺政治力。曾鈺成支持政黨執政，但北京官員唔係蠢，早知道16年來特區管治失敗，係因為冇足夠專業政治人才，一班雜牌軍要磨合成管治團隊，簡直嘥氣。但曾鈺成錯判北京抗拒政黨政治原因，北京並非怕政黨輪替執政，而係根本唔信任共產黨以外的政治勢力，包括民建聯。
一個打單泡嘅特首，在本土政圈「無根無強」、孤家寡人，佢惟有依靠中央轉授嘅支持力量，換句話講特首唔係本土建制派共主，冇能力吹雞，要靠西環扶一把、送一程。但若實行政黨政治，即使用盡方法阻止泛民政黨入閘，篤定民建聯當選，由民建聯執政，對北京依賴程度會大大減弱，首先民建聯議會有票，有支部組織系統，唔使靠西環，再者民建聯多會邀請泛民入閣，以鞏固執政基礎，屆時政策、法案及撥款確保在議會有足夠支持。問題係北京是否樂於見到一個強大、有執政能力嘅特區政府？
特區與西環關係係零和遊戲，特區強政勵治，客觀上等如削弱西環政治影響力，當特首實現良好管治，和諧社會，便毋須其他政治力量協助。究竟回歸以來香港政治上嘅失敗，係北京摸着石頭過河，對政治體制欠周詳發展計劃，抑或北京根本首要關心並非有效管治，而係在於有效控制。
為2017普選設計一個理性制度，以期望能產生一個強勢特首，可能由始至終，只係曾鈺成一廂情願的想法。大家只要睇睇立法會，建制派政黨也「被四分五裂」，民建聯要讓出直選議席及調走左派鐵票畀葉劉、田北辰、鄉事、梁美芬、謝偉俊，就知道北京治港策略。
曾鈺成究竟天真定儍？難道佢仲唔明白「你永遠無法叫醒裝睡的人」當中微言大義。
添馬男
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24