籃球之神大戰大帝，邊個會贏？「籃球之神」米高佐敦（MJ）日前為電子遊戲造勢，話當打嘅自己1 on 1可以打贏熱火「大帝」勒邦占士，不過就可能會輸畀湖人嘅拜恩（Kobe）。大帝聞訊話一切都係宣傳手段，認真就輸了。
讚拜恩學齊絕招
遊戲廠商2K Sports為咗喺美國日前推出嘅《NBA 2K14》做宣傳，請到山貓班主米高佐敦做訪問，大談職業生涯15年嘅點滴。講到最後，MJ被問到喺自己狀態最巔峯嘅時期，最想同邊個球員單挑，呢位有6隻冠軍指環嘅得分後衞就話，對象有好幾個，當中梗係有拜恩同勒邦占士等球員。
不過，今年50歲嘅MJ好似唔知大帝做咗今年封面，勁唔畀面勒邦占士咁話自己只係會輸畀拜恩：「我唔覺得自己會輸囉，就算係都只會唔夠Kobe打，因為佢偷學晒我啲招數。」占士喺巴哈馬同球隊練波嗰時，同傳媒話：「MJ佢真係咁講？我自己都有想像過同佢打啦，不過都唔會發生，講吓咪算囉。遊戲封面人物係我，所以咁都係一個好好嘅宣傳嚟嘅。」而拜恩都喺twitter寸嘴回應：「骨牌效應啫，我偷佢啲招，𠵱家啲後生仔咪又抄我招。」
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24