股壇開心果藺常念（藺Sir）今年65歲，永不言休之餘，亦熱衷參與多項運動，下月參加一個網球公開賽、明年又跑渣馬10公里賽。原來佢仲鍾意打籃球，由2007年開始，為金融界搞精英籃球賽（FSBL），越搞越大，今年有12隊參加，包括各大銀行、券商同港交所（388）都有組隊出賽，港交所IT部仲有一名神射手㖭呀。
藺Sir最初喺證券界組咗隊「狂牛隊」，搵埋中銀打友誼賽，成為FSBL雛形，發展至今，變成本港金融業界唯一一個籃球聯賽。股評人界黃國英、林家亨、港交所風險管理科主管甘健宏（Kevin King）都有一、兩年落場打波。藺Sir近年冇落場，只係積極做搞手。
今屆FSBL剛於9月打完，冠、亞軍分別由匯豐同恒生（011）包辦，狂牛隊只得第三，藺Sir酸溜溜咁話「佢哋咁多人揀一隊梗係勁啦」。不過，藺Sir都好欣賞CY Leung，大讚佢好波，大家咪誤會，此CY不同彼CY，呢位CY係匯豐神射手Godwin。
神射手來自港交所
至於全場神射手就係港交所電腦部嘅張智剛，佢曾經代表港交所隊同中銀國際、恒生、花旗、永亨（302）等六隊對壘，總得分93分。
藺Sir又伺機投訴康文署矯枉過正，佢認為遏止租場炒風係好，但相關措施幫倒忙，市民冇得執雞，租場更難，搞到往年只需一季就完成賽事，今年要由4月打到9月，半年先打完，原因咪就係租唔到場囉。唔知嗰位CY Leung會唔會關注吓呢？
李華華
mailto:[email protected]
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24