兩電跟政府就利潤管制協議進行中期檢討，今年底前就要搞掂，咁啱兩電最近都有大動作，超人旗下電能實業（006）計劃分拆港燈，中電（002）就陣前大執位，好在呢個大執位都喺市場預期當中。
潘偉賢升任總裁
中電集團今年4月事先張揚，前CEO包立賢9月底退任，升上神台去「小電王」米高嘉道理嘅家族公司打骰，CEO個位就由原任中華電力總裁嘅藍凌志接捧。
藍凌志本周一正式埋位，中電順道宣佈一系列高層升遷，藍凌志下面多位高管，人人獲升一級，原任中華電力COO嘅潘偉賢（圖）升任總裁，接替藍凌志嘅空缺，原任輸電及供電業務部總監嘅周騰輝，就會升職頂潘偉賢個位。
中電嘅架構真係好似直升機咁，一條龍咁升上去，論資排輩得幾緊要，潘偉賢同周騰輝，如果按住呢條路走，以中電慣例，未來好可能係中電CEO接班人嘅人選喎。
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24