陳豪上周六接咗懷胎五個月嘅老婆陳茵媺（Aimee）返港待產，仲已經搬咗入大埔比華利山別墅豪華愛巢，雖然Aimee跟住撞車，好彩只係受驚冇受傷，而陳豪啱啱拍完電影《點對點》，𠵱家可以全程照顧老婆。
唔畀Aimee揸車
前晚陳豪喺北角出席電影煞科宴時，陳豪等演員見證導演黃浩然求婚成功，事前冇人知導演要神秘求婚，直至飯局尾聲佢突然跪地向女友求婚，陳豪等都好感動，陳豪話：「好多開心事，自己又結婚生小朋友，𠵱家到導演結婚。」
拍晒電影，陳豪可以專心陪Aimee安胎，噚日下晝點半鐘，陳豪唔再畀老婆揸車，就親自揸車載住Aimee從外返愛巢，到咗三點四十五分，Aimee契哥麥長青（麥包）揸車離開陳宅，麥包話：「契妹返嚟咪飯敍吓，兩家人之嘛。」Aimee撞車心情點呀？麥包輕鬆咁話：「冇乜嘢，唔係撞車，佢俾人撞之嘛。」
另外，Aimee下周二（8日）將出席懷孕後首個活動，有指陳豪原本打算離開無綫以做生意為主，仲會主力北上拍劇，但Aimee大咗肚又留港生產，陳豪計劃有變，留喺無綫嘅機會好大。
撰文：馮仁昭
攝影：朱志聰
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange