每年七一或十一，社民連長毛梁國雄無論歷盡幾次浪、受盡多少風霜，都會爭取進入會展酒會會場為民發聲。查實長毛已經慣咗，政府每次有藉口唔想畀佢入去，例如以前着T恤，就被人話佢件衫冇領；笠番件恤衫，又話佢冇打呔，但刁難完都放行。點知政府呢次有新猷，竟然以佢着波鞋而say no，諷刺嘅係現場有好多嘉賓，都係踩住波鞋滿場飛。
出示請柬連身份證登記
長毛噚日話呀，明明佢有國慶酒會嘅請柬，但係民政事務總署嘅人員係都要佢出示身份證，然後就質疑佢着波鞋唔啱規矩，唔畀佢入場。佢對波鞋係就係有把「鐮刀」，但呢把鐮刀黐住對波鞋，拎唔到出嚟㗎喎。呢對被政府認定「表面係波鞋，原來係鐮刀」嘅「最大殺傷力武器」，原來係長毛參加無家者世界盃時大會贊助嘅Nike波鞋。長毛話呀，明明跟足規矩，着恤衫打呔兼披西裝褸，點知「出事」卻係對波鞋？
八方親眼所見，酒會現場不知幾多人着波鞋或者冇打呔，好似西環契仔謝偉俊冇打呔，佢愛人白韻琹都係着波鞋，佢兩個照樣滿場飛同其他賓客影相，唔見得有乜嘢問題。八方反而好想知，當局為禁止長毛去酒會，可以去到幾盡？下次不如話佢頭髮過長吖；着波鞋都唔得，仲有乜嘢係不可能？
mailto:[email protected]
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24