踏入10月，看看英、西、德三大聯賽榜首誰屬？英超是阿仙奴，緊隨的是利物浦與熱刺；西甲是巴塞與馬體會；德甲則是多蒙特與拜仁。可以發現，除底氣夠厚的巴塞與拜仁外，全部球隊都有一個共通點：沒有換帥！今季曼聯、曼城、車仔、皇馬等多間豪門齊齊轉教練，結果造就阿仙奴、馬體會等本屬「二線」的勁旅有機可乘。
英超去季前3球隊齊齊換帥，車仔的摩連奴明顯未找到贏波方程式；曼城的比歷連尼則全無穩定性可言，時而大炒曼聯，時而敗走卡迪夫城及維拉；曼聯的莫耶斯更連執教豪門的壓力仍在適應中。兵工廠今季終於「買人多過賣人」，加上終見雲格準繩眼光重現，買一個奧斯爾就令球隊脫胎換骨；而熱刺則用加里夫巴利「以一換五」後，實力更強。今季英超有可能出現季尾4、5隊仍有力爭標的局面。
皇馬以1億歐元買來巴利，以接近價錢賣走希古恩與奧斯爾。咁睇，就可想像皇馬管理層有幾「超級大儍仔」。去季希古恩入16球，是賓施馬不穩定時皇馬入球保證；助攻王(15次)奧斯爾的致命傳送，更是皇馬破密集防守的絕招。兩人的作用，就算巴利傷癒，再加對翼畀佢都無法替代。如今又要善於被老闆搓圓撳扁的安察洛堤，為管理層的政策補鑊。至於巴塞點解換帥都咁勁？因為呢架係高智能方程式賽車，任何司機坐上去，都會自動起跑。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange