【銅鑼灣】幸福人妻徐淑敏（Suki）啱啱喺上月22號度過29歲生日，老公黃浩都係上個月牛一，日前黃浩揸住法拉利跑車現身銅鑼灣，原來約咗老婆去賓利Bentley睇車，着背心熱褲騷長腿嘅Suki，一早就由保鑣陪住喺門口等老公，兩公婆會合後即煙韌入去睇車。
當生日禮物
黃浩喺幾個月前以2億收購咗《都市日報》，身家豐厚嘅佢唔知係咪諗住送新車畀老婆做生日禮物，賓利普通一架入門車坐底都要400萬，絕對襯得起黃氏夫婦身份，興奮嘅Suki第一時間坐上司機位試手感，錫晒老婆嘅黃浩乖乖喺隔籬陪坐，之後仲試坐埋後座感受吓，又打開車尾廂研究。
車行職員見大客光臨當然招呼周到，黃浩同職員傾咗一陣，睇足半粒鐘先離去，黃浩做柴可夫接載老婆走，由於跑車只有雙座位，保鑣開門讓老闆娘上車後至獨自走人。另之前Suki生日，兩家人坐埋一齊食飯慶祝，𠵱家兩公婆喺日本旅行，逍遙快活。
採訪、攝影：比華利
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange