NBA其餘22支球隊周一進行埋傳媒日，焦點所在自然係近兩屆總冠軍熱火，「大帝」勒邦占士、獲迪等一眾主力悉數亮相，上月中結婚嘅大帝更加風騷表示，自己擁有3隻指環㖭！
比士利戒毒返熱火
熱火前鋒勒邦占士，上月喺聖地牙哥結婚，仲去羅馬度蜜月，周一叉足電返邁阿密報到；大帝風騷咁同記者講：「我已經擁有3隻指環了！休息期間，我好懷念打波嘅日子，希望開季盡快來臨。」其實熱火3頭犬勒邦占士、獲迪同保殊，13/14球季後就可以透過「球員選項」，決定留隊或以自由身離隊，今夏有關勒邦占士嘅轉會新聞仍然時有所聞，包括有傳佢過檔湖人，不過28歲嘅大帝就拒絕回應轉會新聞，佢話：「我今季目標只有一個，就係協助熱火3連霸，其他事我都懶理。」熱火保持基本陣容之餘，主要加入兩位新兵，包括復出嘅中鋒奧丹，同「麻煩友」前鋒比士利，因吸食大麻被太陽裁走嘅比士利回歸母會，表明已經洗心革面戒毒，希望有新開始。
今季總班費突破1億美元嘅網隊，周一亦都舉行傳媒日；新任教練傑特，帶住一眾高薪兵好似加尼特（KG）、皮雅斯、迪朗威廉士等亮相，37歲嘅KG由塞爾特人轉投，目標當然鮮明，就係希望退休前博多1次總冠軍；KG講：「球隊陣容鼎盛，而且各人都有自己專長，喺呢個競爭環境，我哋都希望可以成為最佳。」
快艇推出有袖波衫
西岸方面，洛杉磯快艇就新人事新作風，前塞爾特人教練李華士接手，新一季球隊亦都加入短袖球衣，續約嘅基斯保羅（CP3），同「入樽王」比歷克格芬、D佐敦等主力，都試着新衫。獲快艇開出3年2,100萬美元合約，李華士目標當然係幫球隊首奪冠軍，雖然快艇目前陣容冇冠軍成員，但同08年塞爾特人情況一樣，李華士就話：「我一向鍾意執教有壓力嘅球隊，因為畀到我挑戰性，球隊亦都具備爭冠能力。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange