美國民主共和兩黨未能就撥款議案達成協議，聯邦政府繼1996年後再次停擺，執筆之時黑期變化不大，道指期貨更輕微反彈，反映早前跌市已反映影響。不過，美國債務上限危機將於本月中殺到，股市難言安穩。
波動市揀股最緊要有防守性，電訊設備股中興通訊（763），有齊國策支持、基金捧場及走勢靚絕三大優勢，絕對值得捧場。工信部部長苗圩上月底出席電訊論壇時稱，內地4G牌照將於今年底正式出台，內地電訊商將積極加大投資鋪網，中興肯定食正條水。事實上，消息指中移動（941）早前為其涉資200億銀嘅TD-LTE無線主設備招標，中興已取得26%份額，成功搶飲頭啖湯。
前景秀麗，自然吸引基金青睞。據聯交所資料顯示，由金手指謝清海掌舵嘅惠理基金，上月24日增持328.9萬中興股份，持股量由4.81%增至5.34%，惠理基金今年成功低揸高沽醫藥股，表現可謂有目共睹，如今染指中興，一兩成升幅相信係最低消費。
睇圖表，中興上月突破三頂阻力後走勢凌厲，創出年半新高，現時正處回氣階段，實為上車嘅大好機會，候回試15.8元吸納，一旦成功破旗，升上廿蚊指日可待。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange