嚟自唐營嘅自由黨黨魁田北俊，喺狼振英做咗特首後，一直不遺餘力「監督」狼英，雖然好多人都話，咁做一定激嬲阿爺，但原來未必噃！好似新任中聯辦新界部部長劉林咁吖，噚日被問到田少成日發炮轟政府仲係咪建制派時，即刻話呀，中央政府都講過啦，接受大家激烈嘅批評㗎嘛，暗撐田少冇問題。唔知西環呢番「默許」，係咪會令田少未來發炮力更強？
稱批評再激啲都仲得
早前去過田少山頂豪宅食飯嘅劉林，噚日出席主要由自由黨前黨友組成嘅經民聯喺新界西開辦事處嘅活動時，不斷被行家問到同田少嘅交往。有人問：田少不時批評狼班子，仲當唔當自由黨係建制派？
一聽呢條問題，劉林即刻為田少護航，佢話對於鬧政府呢樣嘢，就連中央政府都講過，「我哋都可以接受大家對中央政府嘅批評，甚至於一啲激烈嘅批評，最緊要守法就得」，言下之意似乎係：鬧吓政府，有乜嘢問題？等於畀咗個permit田少，繼續放膽「中堅中立」發炮，甚至激烈啲都no problem。
相比之下，成立咗一年嘅經民聯，肯定比自由黨更親政府，但無礙佢哋喺地區直選大展拳腳嘅計劃。主席梁君彥噚日宣佈，佢哋嘅區議員人數已經增至22人，嚟緊會再喺九龍西開辦事處；同樣到場主禮嘅林鄭月娥，噚日就趁機約鄉議局主席發叔私下聚會傾吓偈，相信係為堆填區再闖關做準備。
mailto:[email protected]
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24