利物浦喺周日英超結束小低潮，史杜列治手球都當入，加上闊別英超近半年嘅蘇亞雷斯梅開二度，作客新特蘭贏3:1升上次席，繼續追住榜首阿仙奴。利記同兵工廠喺今屆英超鹿死誰手就有排先揭盅，不過女紅軍就已率先威番次，啱啱贏咗女子英超，打破阿仙奴娘子軍9連霸嘅壟斷局面。
史杜列治夠誠實
史杜列治喺周日場波助紅軍先開紀錄，接應謝拉特開出嘅角球疑似頂入，不過慢鏡頭睇個波原來有掂到佢隻手。史杜列治賽後話：「謝拉特開個角球好靚，不過有少少過頭，好明顯我係打算以頭槌攻門，不過判斷上好似差少少，所以個波最後係有掂到我隻手，但肯定唔係有心，呢啲嘢周時都會發生㗎啦。」肯坦承錯誤，點都係好事嚟嘅，好過阿蘇以前又手球又插水但都「詐詐諦諦」唔認。之不過無論阿蘇做幾多衰嘢都好，紅軍球迷最關心嘅始終係佢入唔入到波，睇佢喺對新特蘭場波兩次接應史杜列治嘅助攻連入兩球，領隊羅渣士賽後就好開心，大讚呢對喺今季英超首次合作嘅前鋒組合威力夠晒勁。
紅軍喺今季基本上只有一個目標，就係全力喺英超爭前4，不過季初戰績唔錯，相信羅渣士都想更進一步試吓有冇機會爭下英超冠軍。之但係聯賽只係踢咗6輪，利記同埋𠵱家喺榜首嘅阿仙奴有冇實力贏到仲要放長雙眼去睇，反而女隊就先幫紅軍實現願望，啱啱首奪英格蘭女子超級聯賽（FA WSL）冠軍，結束阿仙奴女子隊連續9年贏頂級聯賽嘅強勢。
娘子軍破阿奴壟斷
女紅軍喺周日煞科戰主場迎戰次席嘅布里斯托學院，賽前只係領先後者兩分，即係要保持不敗先確定封后，結果無驚無險以2:0擊敗布里斯托，以12勝2負成績奪冠；至於阿仙奴就只係得個季軍。
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24