$25,000話多唔多，但用來影一張人像相，又的確有點奢侈！但Studio Harcourt Paris話晒係八十年老字號法蘭西出品，唔少中外名人亦曾為其座上客，今次我們親試這法式奢華，十盞電影燈打出獨有黑白情調，人像相未見、真身未Show Off，已經夠「曬」！
記者：韓繼聰
攝影：許有達
模特兒：Rain@Unique Model
影前：化強陰影 走閃粉
收得你$25,000一張相，當然唔會叫你齋埋位影相咁簡單，影前必須要化個獨特配合Harcourt的妝容。CEO Catherine話：「Harcourt唔單止影黑白人像，其實亦有影彩色，只係我哋嘅黑白相太經典，亦有我哋嘅獨特文化和味道，所以嚟搵我哋影彩色的客少於3%。」
今次團隊有隨團法籍化妝師，亦有香港幫手，佢哋話：「啞光定妝最能凸顯黑白效果，最基本我哋會加強陰影部份，例如鼻位、腮位，令輪廓更分明，另外，我哋亦會用亮麗的唇彩，令女性嘴唇線條更有質感；但就謝絕閃粉，因為閃粉在電影燈下，及黑白照中效果唔好。」佢哋亦非常注意頭髮的「毛毛」，因為在黑白照中特別明顯。
影緊：大光燈長開 打出傳統美感
化完靚妝，終於到戲肉，法籍攝影師淨係外形已殺死人，官仔骨骨西裝加小小的花領巾，完全法式風情。今次團隊雖在酒店房拍攝，但器材絕不馬虎，眼見十盞大大小小電影燈長着打燈，而唔係一般閃燈，據攝影師Alessandro講，用電影燈拍攝係佢哋傳統，因更能拍出電影感、立體感和深度：「長着的電影燈可以持續營造一個獨特的攝影氣氛，維持被攝者與攝影師的關係，亦能捕捉更多細節。」
現場所見，攝影師和燈光師在模特兒每次轉換一個動作時，都會對每盞燈的角度、射出光的範圍等作不同的調校，非常一絲不苟。以為佢哋會用大底或超專業相機？小記卻發現是Nikon D800配24-70mm f/2.8鏡頭，絕對是平民器材，但見成品卻絕對超班兼具韻味，更加體現到Catherine所講：「相機、科技只是工具，我的傳統、技藝和文化才是重點！」
影後：攝影師團隊評審 一個月取相
今次試影只有半小時，跟正式的兩小時差得遠，但已足見那份認真。據攝影師講，無論今次在香港，又或是在巴黎總部，拍攝後的相片都會經他們精雕細琢，作品要經團隊中20多名攝影師「通過」，約一個月後才會把成品交給客人。所以今次影成點，現在真係無法知道。
不過大家大可到ifc睇睇《A Date with Studio Harcourt Paris》展覽，展出共22張作品，包括達利、蘇菲瑪素、岳敏君、黃秋生等多個名人的黑白人像，都可以大概知效果有幾靚。至於唔捨得畀$25,000的，$100也可淺嘗Harcourt的法式攝影，展覽中設有三部法國直送的自拍機，其中兩部更係亞洲首見的雙人版，帶埋身邊「BB」一齊影張Chok相，仲有Harcourt「H」嘜頭，都有幾成效果㗎！
ifc商場《A Date with Studio Harcourt Paris》展覽
日期：即日至10月13日
時間：10:00-22:00
香港都有得影
今次Harcourt團隊其實只來港三日，據說不少城中富豪都把握機會影張靚相，你都想影？可惜報道出街之時，團隊亦已回老家，不過其實在香港想影類似高級人像亦不難，只要你畀得起錢，不少名攝影師亦有提供服務。有影過類似作品的著名攝影師饒哈林就話：「高定價Walk in影人像，香港真係較少，一般都係按要求再相議價錢，如果要求較高，製作較大型的，過十萬都有。」影開廣告和商業攝影的他，其中一張NBA巨星Kobe的作品，亦甚有電影感，氣勢逼人，有興趣不妨查詢吓！
查詢：glam fab ltd（2246 9621）
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange