【銅鑼灣】現年52歲嘅周啟生早前疑獨留同前妻生嘅13歲囝囝周爵喺屋企，被警方落案拘捕之後仲要上庭，到底佢對個仔點，真係清官難審家庭事，不過佢對𠵱家個太太司徒靄杰同囡囡周晴真係好好。上星期下晝3點周啟生同太太到銅鑼灣皇室堡行街，見到周太已經買到一袋二袋滿載而歸，而周啟生手上就有罐心愛嘅啤酒喺度飲緊。
兩公婆十指緊扣行咗去維園，搵張長椅坐低，然後攞咗部手機出嚟好有心機喺度影白鴿，周啟生𠱁老婆真係有一手，佢二話不說踎喺度扮白鴿行，搞到老婆笑到好開心。
安全過馬路
坐咗一陣兩公婆經維園足球場行去天后一間幼稚園，原來佢哋準備湊女放學。由於未到放學時間，好多等接小朋友嘅家長都要排隊喺門口等，周啟生就行咗去同班菲傭一齊排隊，太太就行開去咗附近間餐廳坐低。周啟生接咗囡囡後拖住佢過馬路，不過由於放學時間馬路多車，周啟生為安全即刻抱起囡囡跑過馬路，去餐廳會合老婆。
採訪、攝影：梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好
多時裝靚嘢睇！