雖然距離萬聖節仲有一個月，東亞銀行（023）噚日就聯同VISA，邀請一班信用卡客仔試玩迪士尼嘅萬聖節主題設施，仲透過四個慈善機構，請來唔少家庭同小朋友入場玩。
東亞副行政總裁李民橋（Adrian）都有帶埋老婆Bonnie同囡囡到場玩餐飽，佢仲特登着件米奇老鼠Tee撐場。佢大爆今年11歲嘅囡囡，最鍾意玩巴斯光年隔籬嘅磁車天地。
另一邊廂，雖然東亞中國副董事長陳棋昌年紀都唔細喇，但就鬼死咁大膽，去玩鬼屋同過山車都不特止，仲要嫌過山車唔夠快。
有記者見到陳生玩鬼屋時，伸手想同「鬼」握手，仲話「唓，嗰啲假嘅?」，認真百厭。
除咗Adrian同陳生，東亞副行政總裁兼投資總監李繼昌、副行政總裁兼營運總監唐漢城，都有帶埋家人去玩，仲同VISA、慈善機構代表同受惠家庭，一齊睇煙花，例牌當然同埋米奇、米妮合照喇。
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24