由韓國紅遍全球嘅騎馬舞大叔PSY（朴載相）大後日又嚟香港取景拍一個耳筒廣告，據知廣告商呢次搵咗同PSY似到十足十嘅「港版PSY」錢國偉（Wilson）參與廣告，錢國偉既導又演，港韓PSY嚟個crossover，諗起都爆笑。
嚟港取景
最近有韓國耳筒廣告商出七位數字酬金邀正版PSY代言，廣告商睇過「港版PSY」Wilson拍嘅《香港Style》MV，於是請埋Wilson客串，兼任導演，廣告會先由Wilson扮肥仔出場，但因為百無聊賴戴起耳筒聽歌，即刻生猛晒，變身騎馬舞大叔PSY。廣告會喺香港取景，唔排除PSY會去山頂同灣仔海旁呢啲景點騷舞技，PSY會爭取時間一日內拍完。Wilson同PSY其實舊年都試過喺澳門孖住出騷，兩人再合作，Wilson當然好期待，佢呢次又導又演，六位數字落袋，Wilson噚日喺電話話：「好開心大家又合作，上次澳門時間太短，今次先算真正合作，廣告入面我會客串一個角色。」問到Wilson有冇練定騎馬舞挑機？佢話：「我邊敢同佢比。」
撰文：馮仁昭
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24