南華金融（619）上周五中午發表通告，指有第三者對公司控權有興趣，消息刺激南華金融午後一度爆升1.2倍至0.182元，埋單亦升48%，成交急增至121球。新一輪券商股併購潮一觸即發，向其他同業埋手實在錯不了，當中又以時富孖寶——時富金融（510）及時富投資（1049）最吸引。
點解時富孖寶最吸引？皆因市值夠細，併購誘因最大，時富金融市值3.8億銀，時富投資市值2.2億銀（南華金融未大升前市值亦僅4.2億銀），單計殼價都唔止呢個數，券商業務變相送畀大家。環顧其他券商股，size與時富孖寶相近嘅有敦沛金融（812），市值3.9億銀，但其市賬率高達2.4倍，反觀時富孖寶市賬率不足0.5倍，折讓超過八成，誰平誰貴一目了然。
時富金融主打證券買賣業務，時富投資則持有時富金融43%股權，前者直接受惠併購潮，故上周五升幅（+9%）亦較後者（+3.9%）強勁。
不過，時富投資亦有經營現時最炙手可熱嘅網遊業務，加上旗下實惠有分拆概念，齋計呢兩個憧憬，現價市值僅2億銀，實在十分抵博。兩隻買齊肯定冇壞。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange