英國型男羅拔柏迪臣（Robert Pattinson）自從與姬絲頓史釗域（Kristen Stewart）甩拖後，緋聞傳個不停。近日他被指搭上荷李活影星辛潘（Sean Penn）與前妻羅賓活麗萍（Robin Wright）所生的女兒Dylan。二人更被拍到一齊夜蒲，令辛潘相當擔心，即警告羅拔別傷女兒心。
廚房錫頸親熱
現年27歲的羅拔柏迪臣單身後桃花旺盛，繼日前傳撻着索女健身女教練後，近日再被指和辛潘與前妻所生的22歲女兒Dylan擦出愛火。據美國雜誌《Life & Style Weekly》爆料，羅拔與Dylan被拍到本月初一同在洛杉磯的Viper Room夜蒲，態度親密。現場人士指雖然有其他人在場，但打扮隨意的二人不停互相調情，又有不少身體接觸，相處得十分自在。
夜蒲完後羅拔與Dylan一同前往Chateau Marmont用餐，之後再回羅拔的住所。有知情人士透露二人一齊入了廚房，羅拔從後攬着Dylan，更親吻她的頸。當晚二人談天至凌晨5時，Dylan仍未離開。
姬絲頓瀕崩潰
據英國《太陽報》報道，辛潘知道女兒搭上羅拔之後十分擔心，即找了對方訓話一番。知情人士透露，縱橫影圈多年的辛潘，十分清楚如羅拔這般年輕有為演員一定有不少美女埋身，因此警告羅拔說：「如果你只是當玩，就不要搞我的女兒，我不想她受傷害。」雖然羅拔識趣地抽身，但Dylan知道辛潘警告羅拔後，便向辛潘大發脾氣。
而早前被指因失戀壓力大而導致甩髮的姬絲頓，被爆每次看到羅拔有新緋聞都大受打擊，陷崩潰邊緣。
撰文：丁焯敏
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好
多時裝靚嘢睇！