網上一則潮文：男人很簡單，一個新game令佢開心成日，一個新女友令佢開心成晚，一個鍾意玩game嘅女友令佢開心成世！男人就係咁簡單嗎？未必，可能係比呢個夢想再簡單啲㖭，身邊嘅另一半，唔好話陪你打game通宵直落咁天方夜譚，求其唔質疑或阻撓或打擊你買個新game返嚟玩，而又唔會喺打機嘅過程，不斷提點你好夜嘞，聽日要早起等等嘅話，其實已經係唔錯。
「男人，因乜你咁鬼貪新忘舊！」呢個星期，iPhone叫你換新電話，Fifa又提你玩新game，男士們應該突然之間好亢奮，新嘢到手，又係發揮時候，之但係隨時搞到同另一半反晒面，「使唔使換咁密呀，家陣呢部上網睇my TV都好順啦！」「唔係呀，新嘅呢部可以用指模log-in㗎，幾潮呀！」「指乜鬼模呀，因住俾人打劫斬埋你隻手指呀！」一係反面，一係冇嘢講。「老公搞乜對住部機郁都唔郁呀？」「好忙呀，check緊啲球員嘅市場價格，準備趁低吸納呀。」「仲細呀你，咁好心機就刨下個市，睇住啲股票好過啦！𠴱啲先係真銀呀！」
女士們，有件事你哋真係要明白，其實男人之家對住啲新玩意、新科技之所以咁着迷，並唔係貪玩咁簡單，而係生活逼人，人越大越發現追唔上社會嘅洪流，而偏偏男士們由細到大，都有個不設實際嘅夢想，就係要做超人，無論係蝙蝠好、蜘蛛好、咸蛋好，鐵唔鐵甲都好，甚至至尊寶，總之就係想有一兩樣嘢係叻過人、醒過人！咁當然結果係大部份都失望而回。
但山不轉人轉，玩熟一個電話，同鬥快儲到一隊有齊美斯、C朗嘅dream team，就成為咗我哋小男人嘅一大成就。所以當你嘅另一半越心急要買新game，某程度代表住佢對生活仲好有passion，並唔係你平時見到嗰位懶懶閒大肚腩咁簡單。
放心由佢玩啦，因為就算係遊戲世界裏面，大部份男士都係輸家，所以三兩個星期之後可能佢又打回原形，萬念俱灰而大把時間陪你。放心，Fifa一年先至出一次新game啫。
KEYMAN
now TV主持
下星期，死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24