【上環、中環】郭富城日前用「過咗去」嚟形容同緋聞女友葉熙祺嘅關係，暗示戀情玩完。佢兩個前日撞正都喺香港有活動，不過佢哋收工就各自夜蒲，未見葉熙祺再漏夜攻城。
城城前晚同經理人小美及工作人員喺上環尚興潮州菜館晚飯，佢哋食到噚日凌晨12點半先走，城城先獨自離開，由保母車司機送佢去附近攞番部波子。問佢咁夜先走，城城笑而不答。
甩咗拖嘅葉熙祺就去咗中環蘭桂坊蒲新場Show Club，不過場中所見，佢成晚都悶悶不樂，玩到噚日凌晨1點幾，佢跟周秀娜車離開。對於俾狗仔隊追訪，葉熙祺噚日凌晨喺微信留言：「我鋼鐵不怕烈火燒＋百毒不侵＋清者自清＋問心無愧＝無所謂。」
張舒雅電鬍鬚仔
同葉熙祺同場夜蒲老蘭嘅仲有何佩瑜（Jeana）、最hea港姐張舒雅、崔建邦、林德信、關楚耀、Rosemary同應昌佑等。張舒雅一拖兩猛男同行，不時同鬍鬚男情深對望過電。崔建邦同男女友人玩到噚日凌晨1點幾，爛醉離場，仲要男友人扶實去截的士。Jeana走時都腳步浮浮，要經理人Roy同助手傍實上保母車。
採訪、攝影：羅德光、李志明、梁繼光
下星期，死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24