阿里巴巴與香港港交所與證監會談判上市失敗，馬雲不肯讓步，傳聞轉去美國上市，多數會選擇納斯特克市場。本來阿里巴巴上市集資過千億元，會對香港帶來好多好處，首先係鞏固香港在全球IPO之領先地位，與紐約倫敦並列，第二係千億上市資金會為有關人士（保薦人、會計師、律師、財經印刷公司、公關公司、港交所等等）帶來8%~10%嘅上市費用，打個折頭都會有五六十億元，如今一切泡湯，好多專業人士見財化水，今年嘅肥大花紅就此不見了，中環消費受唔到刺激喎。
點解眼白白要放走財神？連《金融時報》都覺得詭異，稱讚香港嚴守原則，竟然不見錢開眼，讓馬雲堅持嘅「合夥人制」得到特別寬免。
何解馬雲要堅決保持合夥人制？最主要原因係科網股公司由創始期至成熟期，須經歷幾輪集資，集資額愈來愈大，變相將創辦人及管理團隊之股權不斷攤薄，以阿里巴巴為例，自2000年至今，不斷需要資金注入，結果日本軟庫（Softbank）呢位早期股東至今已累積至35%~37%左右股權，美國雅虎有24%股權，日美資本加起來，實質上控制了阿里巴巴，馬雲與管理層只持有10%~13%股權，上市後若依照一般股權結構模式，軟庫加雅虎加基金投資者好易（如有需要的話）踢走馬雲，令佢失去管理權。為咗防範如此局面，馬雲與班精忠手下欲將公司控制權緊握在手，佢地成為「合夥人」，合夥人有權提名公司董事會多數成員（譬如九位佔了五位），由股東投票通過，股東大會通過的話，董事會成員由「合夥人」（即管理層）控制，而管理層又受董事會監管，變相係自己人管自己人，與現代獨立董事會概念相違反，故此不少投資者會覺得唔公道，違反了「同股同權」嘅大原則。
其實Google、Facebook嘅創辦人亦只持有低於50%股權，佢地採用Ａ股Ｂ股制，公眾持Ａ股，創辦人持Ｂ股，Ｂ股投票權大啲。為何馬雲不採用Google之ＡＢ股制度而要堅持「合夥人」制度呢？到美國上市又是否容易一點？專家意見莫衷一是。失去呢單大生意未免可惜，但長期嚟睇，香港市場聲譽與誠信更加重要，馬雲要硬闖美國就由得佢囉。嗌聲芝麻開門，你估咁易就開得到呀。