東京直擊Hot Toys展　名人改Iron Man

前排銅鑼灣《鐵甲奇俠》展，唔少人都有去打卡，以為成套1：1裝甲已經好勁？更勁的其實在東京！除一眾超人氣藝人名人設計特別版奇俠吸盡鏡頭外，更借來電影真實道具，重現Tony的海邊靚屋！
記者：韓繼聰　攝影：韓繼聰、陳盛臣

潮金奇俠搶眼入場

去《Hot Toys Iron Man 300% - The Tokyo Exhibition》，以為早到半個鐘已好叻，點知人龍早就出現；場館入口設計成鐵甲奇俠心口弦反應堆「光圈」，場地比香港的大、展品亦更多，入口位即見全金版Mark VII，令大部份人一入場已瘋狂舉機拍攝，呢期金色果然爆紅！

Hot Toys主理人Howard。

Marvel Studios還直送家俬道具過來，重現Tony屋企！

仿真度極高的工作枱，有齊工具、頭盔同設計圖。

最愛松田「撮鉄」

Hot Toys主理人Howard也始料不及！日本方面竟找來不少藝人、名人，設計特別版奇俠；當中包括潮流教父NIGO、報道員藝人皆藤愛子、漫畫家奧浩哉及文原聰等，件件充滿個人特色、手工精細！不過最吸睛是松田翔太的「撮鉄」，原來亦是Howard的至愛：「他的設計很有心思，例如他把War Machine的大炮變成攝影機，全身都滿有攝影的細節，加上我知道佢對設計作過多次修改，非常認真！」Howard更透露有意把「撮鉄」量產，不過當然要先過Marvel一關。