書麒百萬寶馬贈秋怡

書麒百萬寶馬贈秋怡

【九龍灣】王書麒同許秋怡呢對模範夫妻,轉吓眼今年已經結婚10周年,佢哋當年奉子成婚,囝囝Cody都10歲,一家三口成日都咁溫馨。呢個星期二正係佢哋結婚10周年紀念日,日前7點幾,書麒開佢部白色平治C63,載住老婆同囝囝出動,去咗九龍灣國際展貿中心嘅車展,據知書麒打算送部寶馬X6畀秋怡做禮物。

秋怡:好開心呀

着紅tee嘅書麒帶住母子裝嘅秋怡同囝囝,先同汽車經紀攞資料,跟住佢哋就不停睇泊喺度嘅靚車,情有獨鍾寶馬嘅秋怡對一部標價118萬嘅黑色寶馬X6好有興趣,佢哋仔細圍住部車睇,書麒仲踎低睇埋車頭,秋怡就同囝囝商量。書麒有見秋怡為咗頭家平日好慳儉,為咗獎勵呢個賢內助,所以大手筆送新車畀佢。秋怡一家睇完車,就去交停車場費揸番自己架平治離開。

【踎低研究】

【吹水攞料】

【盡興而回】

秋怡獲老公送車做禮物,佢風騷到喺微信朋友圈上載咗10年前同書麒嘅結婚舊照緬懷一番,秋怡噚日喺電話度話:「好開心呀,不過下次老公送嘅大禮,可能要等到結婚20周年啦。」
採訪、攝影:黃曉程、徐錦池

下星期,死過翻生的卓韻芝要同倪匡蔡瀾肥佬黎講人生大限?
毌需忌諱,《亂噏24》周一至周五預埋你: http://bit.ly/appletalk24