【牛腩篇】我承認我係阿仙奴迷，或者寫完呢篇文，會俾人話係牆頭草或者尚書大人，但阿仙奴確實俾到球迷希望。喺奧斯爾轉會新聞傳得火熱之時，我仲幾乎跟戰友守丹打賭，話雲格唔會花咁多錢喺一個球星度，結果令我大跌眼鏡。
之前我對阿仙奴死心，唔係阿仙奴唔使，而係唔識使；過去阿仙奴唔係唔使，但有經濟學頭腦嘅雲格，將買人風險分散；其實上季阿仙奴淨收購球員支出，都講緊3、4,000萬鎊，辛迪卡索拉、普多斯基、基奧特，個別表現絕對唔差，但始終幫唔到阿仙奴突破。
好多人批評皇馬簽人策略，重點收購巨星再配綠葉，西班牙傳媒統稱為「費高加馬基列尼」政策；無論市場同組軍，我都認為係啱；今次雲格學精咗，孤注一擲買奧斯爾。頂級球星同一般球星嘅分別，往往就係關鍵時間嘅作用，帶俾隊友壓場感。奧斯爾效力皇馬3年間，歷盡比歷連尼同摩連奴兩大名帥，仍然成為主力，級數唔使懷疑，皇馬今夏籌旗買巴利而放棄佢，唔少球員好似C朗都極為惋惜，仲有競爭同樣激烈嘅德國，奧斯爾亦都穩站主力，亦都係證明。
以往阿仙奴戰績反覆，更不時領先下最後失分，往往與欠缺壓場球星有關，上仗英超對史篤城，阿仙奴一度被逼和1:1，但奧斯爾好快就顯身價。兵工廠聯賽4連勝，或者對手不強，但年輕人建立信心後，面對任何對手都無所畏懼。文：牽牛
下星期，死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24