聯儲局上個禮拜三爆冷唔收水，資產市場亢奮唔夠兩日就無以為繼，原因係大家發覺，伯南克點諗原來唔係咁易捉，儲局何時退市仍是未知數，加上國會兩黨繼續內訌，遲遲唔肯通過下年度財政預算，令市場擔心佢哋一個唔覺意玩大咗，聯邦政府可能要暫時收檔，個市於是借勢調整。
高頻交易造成不公平
俗語有云，早知三日事，富貴萬千年！但隨着資訊科技迅速發展，家陣唔好話三日，就算早知三秒事，已經可以發大達，今次儲局議息引發嘅洩密疑雲，就是最佳例證。
話說儲局於上周三公佈議息結果時，芝加哥同紐約嘅黃金產品交易突然同步急增，涉及嘅規模據報超過60億港銀，由於由儲局所在地首都華盛頓傳送資訊去上述兩地，理論上點都會有少少滯後，遂引起陰謀論者大做文章，懷疑有傳媒預早放料，令春江鴨有機可乘，利用快如閃電嘅高頻交易偷步入市食大茶飯。
姑勿論陰謀論成立與否，儲局當日唔退市，的而且確刺激咗金價當日抽升幾十美元，能早着先機入市，賺取嘅盈利肯定係天文數字，難怪事件會觸動聯儲局神經，聲明要展開調查。
而事件亦再次引起市場關注，現時只有大鱷能專享嘅高頻交易造成不公平市場，令散戶任人宰割。
儲局繼續踩行油放水，美元當然係冇運行，歐元、英鎊近期衝上1.35及1.6美元樓上，師奶至愛嘅澳紐元亦分別係94及83美仙徘徊。
由於10月會議冇記者會，市場估最快12月至開始退市，除非美國債務上限危機爆大鑊，引發市場恐慌情緒，令資金重投美元避險，又或者歐洲經濟走樣，否則美元短期難以呈強。
歐元見1.36開淡倉
雖然美元近日勢弱，但值得留意嘅係，近期幾間外國傳媒，不約而同引述調查報告，指中國等新興市場近年工資大增下，與美國嘅薪酬差距不斷收窄，令美國製造業重拾競爭力，例如蘋果、通用電器及Caterpillar等巨企，已開始將生產線調回美國本土。
最有趣嘅係，《華爾街日報》指出，幾間早年已落入外資手嘅著名馬桶生產商，正罕有地擴充美國生產線。
由於馬桶主要靠人手生產，工人除咗要有良好體能，亦要識手工藝，故此大部份廠商喺過去20年，都會把生產線遷往中國和墨西哥等低成本國家。家陣廠商竟然肯將部份生產線轉返美國，證明當地製造業競爭力回升，有助促進整體經濟復蘇。
由此觀之，美元中線前景唔會衰得去邊，建議於歐元升至1.36美元開始造淡，設100點子止蝕，止賺位睇1.335。
奇兵
本欄逢周五刊登
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange