港股今個星期四日跌足三日，已重返聯儲局宣佈唔收水前嘅水平，燦爛歸於平淡，加上債務上限爭拗重臨，要港股上闖24000點大關，大家恐怕要畀多啲耐性。
大方向未定，揀股從圖表出發，反而有機會執到寶。早前推介過嘅天業節水（840），噚日再升逾半成，成功突破圓底頸線。點解走勢咁凌厲？原來有嘢跟尾︰消息指《全國灌溉發展總體規劃》已編制完成，行業補貼額度隨時高達600億人仔，並會於11月三中全會後公佈細節。天業節水現價PB未夠0.5倍，變相五折大平賣，有貨嘅戰友可繼續放紙鳶。
同樣喺之前提及過嘅梳化股敏華控股（1999），破頂後出現一輪整固，噚日逆市衝高3.3%，話唔定又係好消息跟尾。至於有乜好消息，最大機會就係家具舊換新計劃。北京7月時開始新一輪舊換新計劃，《北京青年報》記者親身視察，用咗六個字形容︰「簡單、快捷、專業！」在在證明今次計劃十分成功，話唔定阿爺嚟緊會將計劃擴大至其他地區，產品需求肯定有增無減，加上三中全會臨近，城鎮化或有眉目，敏華肯定食正條水。集團已發盈喜，預計年度化市盈率僅12倍，以增長股嚟講絕對超值，再破頂只係時間問題。
唐牛
下星期，死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24