拿玻里季前賣走卡雲尼，唔少人都擔心佢哋喺新季仲有冇好成績，點知呢支意甲球隊由新帥賓尼迪斯帶領下，一路贏波贏盤，帶挈捧場客。拿玻里喺周三意甲主場迎戰薩斯索羅，呢隊幾乎連名都噏唔到嘅升班馬，賽前4戰全敗失成15球，點知拿玻里爆大冷俾對手1:1逼和，爆6.3倍和，長勝盤王竟然喺呢場失威，估佢唔到。
僅和包尾薩斯索羅
拿玻里雖然賣走咗卡雲尼，但用呢一大筆錢買咗希古恩同荷西卡利祖等一班新兵返嚟，實力有增無減。隊波喺季初頭4場聯賽，加埋歐聯分組賽對多蒙特全部贏晒之餘，無論「讓球主客和」同「讓球」都全部贏盤，周三主場對住1分都冇嘅薩斯索羅，開個「讓球主客和」[-1]睇怕食硬，點知就出事。
薩斯索羅啱啱先喺周日慘吞國米7蛋，到今場拿玻里喺開賽15分鐘就由迪斯馬利建功，滿以為又一次大屠殺，點知薩斯索羅喺5分鐘後就由施蒙尼沙薩扳平，1:1呢個比數直到永遠。主場意外失分，賓尼迪斯賽後唔多意外：「每場波一開波嘅時候都係和波，到最後拎到1分冇乜大不了，我哋唔會一路係咁贏。如果因為一支球隊啱啱輸0:7就低估佢，係好危險嘅事。」肥賓你就講得輕鬆，難為班真金白銀撐你嘅球迷，連本報名家都有喺擂台搵拿玻里[-1]做過關穩膽呀陰公。
羅馬全勝盤王是也
拿玻里連勝斷纜，今季意甲仲有一支長勝軍。今季由新帥魯迪加西亞領軍嘅羅馬，陣容同樣有唔少改變，周三作客森多由新兵貝拿迪亞，同嚟自阿仙奴嘅謝雲奴各建一功贏2:0，創球會紀錄開季頭5場贏晒，獨佔榜首之餘仲成為唯一盤王，5場意甲都贏盤。同樣保持不敗仲有衞冕嘅祖記，佢哋喺周三作客基爾禾半場落後下2:1反勝。
下星期，死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24