前廉政專員就腐化事件前言不對後語的供詞，且有發假誓之嫌，再被立法會帳目委員會傳召出席公開聆訊，不過期間答辯「如常」，續砌詞狡辯，若非如主席所斥「離題」、「遊花園」，就是「唔知道」、「唔記得」。面對議員質問，甚至意圖卸責下屬，其中包括昨日應邀作供的這位，反覆重看收費電視新聞片段，每見處長嚴正反駁和討回公道的畫面，簡直大快人心，更值得與眾再享。
簽個名即變「存貯」禮物
首先被問及為何宴客時酒水可以分單，而非按照既定指引入賬，廉署社會關係處處長（社關處）穆斐文娓娓道來：「因為酒已經買咗，亦都事先係得專員嘅批准（即係自成既定事實），所以就冇特別喺酬酢嗰度另外提出。而且帶乜酒，帶幾多支酒，亦都係專員指示，並唔係社關處人員覺得嗰餐要飲酒就帶酒去，因為社關處人員係冇飲酒呢個習慣。」腸都畫埋出嚟，嗰隻湯公仔都無所遁形。然後穆處長再以公帑購買茅台為例：「專員就提出叫佢哋（即社關處同事）要買兩樽茅台，咁而佢哋從來未，因為係未買過，亦都唔知喺邊度買，唔識買。係策略組嘅同事（涉及「國酒」，自要提升至策略層面）去買咗兩支茅台，專員就係酒單上高簽咗名嘅。」勞師動眾，不過就要為了殷勤招呼好此酒者。
簽名畫押嘅又點止國酒，本地神級食品亦同登送禮金榜。傑哥提問：「牛腩（字正腔圓到呢，直情係正音教材）魚蛋係不可能成為「存貯」（新聞「走字」卻是「全署」，怕是捉錯用神）禮物嘅，因為湯顯明簽咗名落去（我試圖想像點簽喺舊牛腩或粒魚蛋度），咁咪就可以成為存貯禮物，咁咪可以公帑支付囉，係唔係？」穆處長斬釘截鐵回答：「同意。」然後超人議員接力問係咪專員批准就如免死金牌？另一助理處長補充謂其批准係「public（該是proper吧）」嘅approval。穆處長語帶無奈兼氣憤說：「我都答你唔到，呢個牛筋牛腩呢，乜都好呢……我亦都係睇到呢個報告先知有呢個禮物。」以後香港伴手禮又多兩樣。
主席旋即要求「叫佢哋俾番啲魚蛋收條。」傑哥跟手：「牛腩要埋啦。」最後就係「雙併」拎走，唔知有冇叫多個油菜。講完食，就到玩，穆處長續呻：「因為發覺睇到個行程……就係話冇啲公務，咁佢（湯）訪問麗江市都去咗人民檢察院（未知考察一個古城小院對防貪工作意義何在？），咁你話究竟係去玩？當然你睇番，係玩嘅成份居多（擲地有聲）……你可以話我警覺性非常之低（能有如此反省，較諸自我審批核准那位，已是「高」度敏感），我就冇做到……提出任何異議，並無。」
然身為署中人起碼要「有」這種落落大方坦誠悔過的覺悟，相比專員「無」恥抵賴，輕言只是行政失誤和程序出錯要強得多。
香港勝在有ICAC……正直盡忠的員工。
盧先亞
下星期，死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24