【咖喱篇】阿仙奴第一場輸俾維拉後，成隊波生晒，係咁贏，法米尼同奧斯爾兩位新兵完美融入，令球隊實力進一步加強。不過小弟認為呢隊阿仙奴表面風光，內裏好多隱憂。
我哋由前線數起，𠵱家阿仙奴係得一個擺得上枱嘅中鋒，就係基奧特。如果佢傷咗或者腳風唔順嗰陣點算，唔通靠賓特拿？禾確特雖然成日都想打最前，但佢啲把握力「出晒名」，係個浪費機會主義者；至於普多斯基就仲傷緊，而且佢喺阿仙奴表現好飄忽，仲未得到信任，同埋佢根本唔擅長踢中鋒。季前，唔少阿迷都話雲格要喺3個位置增兵，分別係前鋒、防中同中堅，最後雲格簽咗法米尼嚟解決防中問題，至於前鋒同中堅就冇理過。
雲格話佢自己擁有3大中堅，有梅迪薩卡、哥斯尼同華美倫，但講真，佢哋3個都唔係頂級，梅迪薩卡轉身慢，哥斯尼唔穩，而華美倫就做咗文員，最近睇波多過踢波。作為一支要多線作戰嘅球隊，華美倫開季又唔踢得，但雲格竟然唔買中堅！雲格話有沙格拿喎，但問心，有時比賽尾段搵佢頂一陣就話啫，真係正選，點會穩陣。此外，如果沙格拿打中堅，右閘就出贊堅臣，成條後防即刻差一截。
𠵱家阿仙奴開季一條龍，只係賽程安排得靚，係得熱刺難搞。去到大概11月頭，阿仙奴要連續對多蒙特、利物浦同曼聯，到時先見真章。文：咖喱
下星期，死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24