先施（244）大搞形象革新，首階段進駐MK潮人陣地瓊華。呢間老字號開張當日，更加請周秀娜撐場，先施想搶年輕人市場嗰團火，好明顯真係好大。
菲菲眼見先施MK開張係威係勢，當晚即時去行個圈。就咁睇，新店裝修明顯落咗心機，搣甩過去寒酸感覺，甚至比永安百貨光鮮。舖面光猛，擺貨有條理。
不過，行街精菲菲，只逗留短短5分鐘，就可給予「冇嘢好行」評級。
新店裝修冇錯係靚咗，不過個死症仲未搞掂，就係唔識搞display。
直擊當日，電梯徐徐升上1樓女裝部，見到幾個電梯前嘅公仔，當堂打個突。公仔身上嗰幾件衫，天啊！那根本就係「姨姨Style」！再望埋其他display，彷彿被姨姨衫包圍，心諗：說好的年輕人市場呢？
行街好多時係睇display，估計間舖行乜style。就算先施入咗好多啱年輕人口味嘅產品，display唔靚令新產品唔起眼，變相浪費買手心思。先施如果真係希望年輕人畀機會佢哋，亦請公司改革再去盡啲。否則以目前新店格局，唔講嘅仲以為先施想全力轉營做自由行百貨生意。
Fifi
本欄逢周二、四刊出
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24