本地零售股炒風旺盛，資金繼續喺市場尋寶，旭日企業（393）今年冇升過，隨時平地一聲雷。
旭日主打服裝零售，網絡分佈中國、香港、澳門、澳洲、新西蘭、越南及中東等地，零售店達3,000間，旗下品牌包括真維斯，以及滑浪好手至愛嘅Quiksilver等。截至今年6月底止，半年盈利再跌35%，賺5,324萬銀，拖累今年股價大跌24%；但睇真啲，上半年盈利其實較去年下半年升3.7%，反映業績已見底，股價大有跌過龍味道。
盈利有𥌓光，從估值出發更見吸引，旭日現價市賬率僅0.7倍，較同業I.T（999）及堡獅龍（592）1.1倍市賬率，大幅折讓近四成，後兩者單日有半成升幅，旭日表現理應更佳。旭日屬慷慨派息一族，以去年派息12.15仙計，現價息率高達7.1厘，好過唔少REITs，手頭淨現金7.2億銀，相當於市值四成，含金量極高。
旭日噚日收報1.71元，升1.8%，成功企穩10日線，短線有望借今次零售股熱潮炒番轉，係咁易用今年高位反彈0.382倍作目標，可見2元，潛在升幅17%，屆時市賬率都未夠0.9倍。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange