前晚見到有間公司份通告幾正，就係金山能源（663）。佢話公司已就一宗拍賣提交咗標書，拍賣涉及若干石油同天然氣資產，包括具潛力應用於石油及天然氣行業作為石油開採商業活動工具嘅專利，中標結果將喺下個月頭公佈。最抵死嘅，佢話個專利係「價值不菲」。
講到咁正，一於摷吓金山能源啲資料睇吓，睇完先知，原來真係正嘢，公司舊年10月已經轉咗手，新主仲要係雲集中外猛人，轉咗手一年終於做嘢！更關鍵嘅係，佢哋手貨嘅每股成本價係0.45元，現價先至係0.355元，足足平兩成，有得諗喎！
現價買入 平大股東兩成
先講佢轉手個過程先，喺舊年10月，金山能源以每股0.45元向一間私募基金Jade Bird Strategic Investment發行15.56億股，佔擴大股本後嘅52.12%股權，成間公司咁就轉咗手。至於呢間Jade Bird來頭唔細，股東包括Benjamin Clark Danielson、北大青鳥（8095）及其他獨立第三方。呢15億幾股，係真金白銀注入公司，係畀公司還債，所以以噚日收市價0.355元計，佢哋賬面係輸緊。不過，私募基金一向唔在乎短線輸贏，因為佢哋嘅做法通常都係執靚間公司，跟住再推介畀其他基金，最後股價就倍倍聲上升。
事實上，Jade Bird入主咗金山能源後，除咗揼水入去外，今年3月仲委任咗Jade Bird其中一位猛人股東Benjamin Clark Danielson做公司嘅執董同投資總監。呢位Benjamin都幾猛料，喺美國基金界好出名，佢喺2006至2012年，喺美國知名私募基金Quintana Capital任職中國區投資總監。再之前仲勁，喺GE Capital（通用電氣資本）旗下嘅GE Energy Financial做副總裁，專責全球能源投資。佢經驗咁豐富，要搞起金山能源易過借火。
至於金山能源前晚出通告話買若干石油同天然氣資產，應該都係經佢手搞，故買得成嘅機會極高，亦同時成為金山能源一個新轉捩點。因為有新項目喺手，Benjamin就可向基金界推介。
至於另一主要股東北大青鳥，其實近期都紅咗好多，因為股價表現強勁。其實北大青鳥質地唔差，尤其大股東係北京大學，點都唔會衰得去邊，所以北大青鳥有份打理金山能源，應該靠得住。
再計計佢數，截至去年底，金山能源NAV係0.527元，現價都仲有唔少折讓，同埋現價買仲平過大股東嘅每股成本價，所以現水平買入嘅風險低，而值博率高。再睇圖表，自舊年10月轉手後，係頭兩三個月升過之外，之後大部份時間都調整，都收集咗成半年，個場洗得乾乾淨淨。𠵱家有新項目消息出籠，應該係收齊貨重新啟航嘅訊號，短線買入先博重上新主入主後見過嘅高位0.68元，中線睇1元以上。
陳承龍
本欄逢周四刊登
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24