港交所（388）建議上市公司董事會成員多元化，包括搵多啲女董事，吳光正旗下會德豐（020）噚日就宣佈，委任上月底退休嘅醫管局前財務總監（CFO）謝秀玲做獨董。早前上市公司通常搵恒生（011）前一姐梁高美懿做獨董，睇嚟𠵱家多一個選擇。
謝秀玲今年60歲，早於1991年醫管局成立時加入醫管局，服務咗22年，佢本身係會計界出身，絕對勝任女掌櫃。香港會計師公會前會長周光暉早前亦撰文，大讚佢肯為會計界做義工。
除咗謝秀玲，會德豐同日委任科大顧問委員會委員梁國偉做獨董。加埋晒，會德豐共有7名獨董，佔成個董事會一半，認真人強馬壯。最重要係，吳光正位公子吳宗權坐喺會德豐個董事會度，有咁多專業人士畀意見，實冇走雞啦。
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24