近日有報道指馮氏兄弟私人基金，不停到英國高檔「裁縫街」Savile Row「集郵」，最新就購入咗專做老牌訂製西裝的Kilgour，聞說Jude Law和Daniel Craig都係佢客仔。其實呢個已經係馮氏收集的第四個Savile Row品牌。早在08年佢買入破產的Hardy Amies，其創辦人除了曾為英女皇做過衫外，仲為科幻經典《2001太空漫遊》設計戲服。而利邦（891）旗下的Gieves & Hawkes（G&H）亦在該處有舖；Kent & Curwen下個月都會進駐。市傳馮氏未打算收手，仲贒緊有無其他男裝品牌可買，唔通真係想買起「裁縫街」，有大茶飯食？
這些品牌個個來頭好勁，但其實面對時代轉變，呢幾年捱得好辛苦。事關近年潮流興smart casual，金融才俊都少咗打呔，加上經濟唔好，大家情願簡單、fashion啲，唔一定再要double-cuff恤衫襯晒袖口鈕。所以馮氏收集這些男裝，未來一定要大轉型，做更多中高價成衣，分銷出街，做大個餅，先有前景。
名牌未來一定要走global路線先夠競爭力，睇LVMH及Kering不斷收購就知。馮氏的策略係啱嘅，只是海迪擔心，品牌管理外行人唔易做，而且要長期燒錢。如去年利邦買入的G&H，2011年就蝕350萬英磅，公司今年已講明投資歐洲市場，未有咁快會止到血。如又搵外援或者利豐（494）一齊搞，關連交易勢有增無減，不可不留意。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange