百年老店先施（244）希望飛甩老土，又改logo又請𡃁模做代言人，仲連開中環、旺角、銅鑼灣三間新店，投資者即刻入場助興，刺激公司股價噚日爆升29%，升到8毫子，可惜公司市值都仲係唔夠5億元。
先施、永安呢類老店，經常傳出賣盤。先施第三代傳人、行政總裁馬景煊早前都好老實咁講，話經常有人𠱁佢賣殼，但佢點都唔肯，只係想一心一意搞好呢盤家族生意。
照咁睇，佢呢次搞大革新，應該都係想叫班潛在買家死咗條心。就算真係要賣，都等佢搞大盤生意，推高市值，他日可以賣到個好價錢啦。華華噚日收到唔少朋友反映，指先施旺角新店環境確實唔錯，衰在產品牌子唔夠人氣。即係同志仍需努力喎！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange