李治廷、「柒良」蔡瀚億、文穎珊（Janice Man）等前日喺圓方出席《一級雙雄》首映禮，李治廷同柒良喺台邊有講有笑，當記者邀請佢哋一齊合照時，李治廷竟然冇反應，助手仲耍手話唔影，搞到柒良企咗喺度好尷尬，反而JM就同柒良興奮玩自拍。問李治廷識唔識柒良？佢話：「死嘞，我認唔到個名，但我識《狂舞派》個producer Winnie曾，佢係我同學個阿姨，《歲月神偷》去柏林影展時已認識。」
冇睇《狂舞派》
李治廷曾揚威海外，最近又同「國際范」范冰冰傳拍拖，名氣當然勁過柒良，但李治廷同冰冰部新片《一夜驚喜》截至前日在港只收6萬2千幾票房，同《狂舞派》嘅1,280幾萬票房有一段大距離；《狂》片早前入圍第56屆亞太影展，同奪得日本福岡國際電影節嘅觀眾大獎，後勁凌厲嘅柒良話：「《狂》片係一個好靚嘅夢，呢個夢好似煙花咁越爆越勁，超乎預期。」
李治廷話冇睇《狂舞派》，問係咪掛住拍拖？佢話：「係顧住寫歌。」寫情歌？佢笑話：「寫英文歌，我係演員，可以幻想對象。佢（冰冰）之前錄歌，我嘅意見都肯聽。」追問兩人關係？佢話：「嗰啲劇照，我好鍾意去旅行，到時有相再傾啦。」
撰文：馮仁昭
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24