曾有報紙報導、影埋相，年青女子在銅鑼灣旺區靜坐商場外邊，神情呆滯，口唇邊有白色粉沫，企起身行路亦好似企唔穩，左搖右擺。路人見到，當然唔敢行埋去。如此場面，究竟發生乜嘢事呢，假若警察見到，有乜好做？
根據現時法例，警察冇嘢好做，最多係勸年青女子坐低，叫佢打電話搵朋友到場幫助。禁毒常務委員會昨天（九月二十五日）發表諮詢文件，希望開展廣泛社會討論，香港應該如何處理近年時興嘅21世紀吸毒問題（即年青人索Ｋ、索冰），警方是否對一啲有合理懷疑嘅個案，視若無睹，全不理會吖？還是立例授權俾警察可以在「社區驗毒」，好似當街查身份證咁樣，見到上述女子個案，就可以主動調查？
左丁山聽到呢個消息之後，對一位社工講：「授權警察進行社區驗毒，好可能引起人權組織抗議（一）警權太大，（二）侵犯市民人權噃，泛民主派會因此而反對嘅箒。」社工話：「我都係民主派，要求真普選，但我地同行、學校社工見到，自從學校可以要求學生驗毒之後，學生吸毒情況，已見和緩，學生吸毒數字逐漸減少，既然學校驗毒有效，推廣至社區驗毒有何不可？」
左丁山話：「問羅沃啟啦，人權大過天呀。」社工答：「我以為年青人之最大人權就係保障佢地將來沒有膀胱癌、沒有腎病、沒有陽萎、沒有小便失禁，及無須隨身孭尿袋孭一世。只要提早拉一啲吸毒青年，越早越好，我地就可以強逼佢地戒毒，直情係對當事人，對當事人父母兄弟姊妹功德無量，對得住納稅人有餘。講吸毒人士有不被強逼接受非自願醫療檢驗嘅人權，只係空講抽象人權箒，並無內涵。」
講到警權人權就茲事體大，人人意見都唔同，泛民主派應該持開放態度，讓旗下議員自由發揮，不將事件與政治綑綁，當然，一個大問題係何謂「合理懷疑」？警方要界定清楚，不容濫用，但好似上述女子口邊面上有白色粉末，神情呆滯嘅例子，應該算係合理懷疑啩？總之諮詢文件一出，意見必多，吸毒關乎下一代前途及二三十年後之醫療負擔問題，大家適宜關心多一啲。