「點樣將資料由舊機搬落新機？」相信唔少人恥笑呢個口號。
科技面前唔少人要跪低，話說老媽前排煲劇煲壞電腦，聰明的她第一時間唔係搵Samantha，而是搵樓下整電腦的帥哥，因為帥哥只會整機，不會埋怨其瘋狂煲劇，導致電腦危殆，電腦住院多日又重生，相信唔少師奶已視呢位帥哥為救世主。
社區需要電腦醫生，國家要更高級的專才，尤其關乎面子的大型項目，龍頭電訊設備股有優勢，華為唔恨上市，炒提供基站設備和傳輸網的中興通訊（763）合情合理。
前海管理局早前公佈，為促進三網融合，正籌建前海訊息通訊發展公司，而早排公佈的18個重點項目獲得優惠政策扶持，中興亦包括在內，南方有個前海，北望的上海自貿區亦有通訊基礎建設的需要，自貿區概念近在眼前。
再者，上月傳出中移動（941）200億人仔的4G網絡建設大單，華為和中興各拿下26%，據中興的中期業績，運營商網絡業務佔收入一半，毛利率逾三成，非常好搵，加埋上半年淨利潤靚仔，該股噚日創52周新高，應該能夠一洗頹風。
Samantha
本欄逢周一、三、五刊出
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24