常言道，人生自古誰無死？Pro J早排出席一個展覽會，題目全部係人生最後一程服務。社會風氣慢慢改變，越來越多人願意為自己的最後一件人生大事早作準備。
創意服務搶市場
仁智國際（8082）作為香港市場少見的殯儀股，Pro J有幸之前同佢哋管理層吹吓水，佢哋好有諗頭。殯儀行業係一個古老行業，但投資前景仍然吸引，生意長做長有，收入亦穩定。不過，香港的殯儀行業依然處於一個有待規範的階段。一個成熟的行業，需要規範化的產品及服務，同時市場透明度提升。而仁智就係要喺行業規範化去再重組市場規則，爭取市場份額。
仁智做生意同時亦強調企業責任（係上市公司都係咁講），推出多種特色及創新服務。譬如建議採用環保棺，唔講唔知，用環保棺可提高火化爐的效率，縮短輪候時間，符合環保原則，對家屬同整體社會都有好處。
好多人會擔心用環保棺會唔會唔夠 「風光大葬」，市場接受程度會大打折扣；仁智同時諗到推出以平治房車為客戶送上最後一程的服務。聽講架平治要成200幾萬。Pro J有幸見過但無緣一坐，果然係貨真價實！另外，之前日嘈夜嘈的私營骨灰龕事件，喚醒咗大家知道地理因素嘅限制。遺體與其要寄存喺殯儀館或食環署，仁智索性準備提供骨灰水晶服務，將骨灰用技術壓成水晶吊飾，畀親人可以隨身攜帶紀念，比存放係其他地方更貼心。
仁智致力以新的企業思維去經營傳統行業，用逆向思維去想，既然有婚禮統籌，當然亦可有喪禮統籌，據聞賭王何生都有染指內地墓園行業，呢一行確實有投資前景。做人生前死後都係為間屋。繼續追蹤，出發！
徐燦傑
中國銀河國際財富管理主管
本欄逢周三刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange