為免令人覺得舊年撐錯狼振英，中央堅持唔搞Plan B，任由689繼續做特首。之但係呀，狼振英管治有幾不濟，相信中央有眼睇，所以政圈盛傳就算冇Plan B都有Plan C，就係架空狼振英，由政務司司長林鄭掌實權嘞！狼振英可能都知道北大人心意，為免留港添煩添亂，專注做離岸特首就算，內交越搞越密，隔月北上一次，睇怕特首辦遲早封塵。
噚日狼振英出席行政會議前，主動喜孜孜向傳媒公佈：我又飛嘞！佢話佢同特區政府高層好多同事，要推廣香港作為一個經貿同金融中心，所以要搞多啲外訪喎，但佢之後講嘅外訪，全部都係大陸遊囉。
八方同大家一齊齊睇睇佢嘅「外訪」行程嘞。狼英先會喺本周四率領一個約有90人、包括特區官員、貿發局成員同工商界人士嘅訪問團去重慶，推廣香港同重慶雙邊金融、貿易同經濟合作關係喎，可能趁機順道感受吓，冇咗薄熙來唱紅打黑後嘅重慶有乜嘢唔同。
順道同彭清華敍舊
去完重慶後兩個月，狼英11月又帶隊去廣西。之前佢透露去廣西係招商，咦！佢嘅伯樂、前中聯辦主任彭清華咪調任廣西省委書記，到時順道聯誼兼敍舊，呢種內交認真happy！返港冇耐，明年1月狼英又出發，今次目的地係福建，話要推動香港經濟發展。可以他他條做離岸特首，怪唔得叫極都賴死唔走。
mailto:[email protected]
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇：
http://bit.ly/appletalk24