港股未有大方向，惟有向概念股埋首，國慶黃金周臨近，零售股係其中一個炒作主題，化妝品股莎莎（178）及卓悅（653）屢創新高，今年銷售表現靚仔嘅利信達（738），絕對有力炒番轉。
主打鞋履、手袋及配飾嘅利信達早前公佈，截至8月底止第二季，自營零售業務及同店銷售，按年分別增長22.3%及17.7%，較首季19.2%及14.7%增幅更勁，反映業務增長勢頭持續。最新數據顯示，中港澳三地共997間零售店，較去年同期淨增加100間，當中827間為自營店，170間為特許經營店。
另一賣點係派息慷慨，自2004年度起，每年也回饋股民，以去年全年派息0.142元計，現價息率4.6厘，防守力一流。利信達手頭現金達4.4億銀，相當於市值逾兩成，財務健康。集團8月宣佈出售位於香港仔嘅貨倉單位連四個車位，預計收益達8,791萬銀，相當於去年全年盈利五成，未來業績肯定如虎添翼。
睇圖表，利信達9月初一度高見3.4元，其後反覆回落，成功補回上升裂口，預期黃金周交到功課，有利新一輪升浪展開，現價3.08元入場，短炒博再衝上3.4元，已有一成利潤，屆時市盈率只係12倍。
唐牛
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24