無綫劇集炒冷飯，主題嚟嚟去去都係宮廷爭鬥，幾個女人鬥一番，估唔到連新聞部都一樣。無綫新聞小花黃紫盈，早前喺報道前南非總統曼德拉病危嘅新聞時「落淚」，原來因為覺得被另一女主播張文采欺壓，繼而被爆兩人明爭暗鬥。呢場新聞部《金枝慾孽》，最近有「最終回」，淚眼小花鬥輸咗，突然辭工唔撈咯。
最新一期《東周刊》話，紫盈BB滴淚事件曝光後，曾經一度「被放假」；至兩個月前復工，受事件拖累嘅佢唔再受力捧，仲被調去互動新聞台返深宵更。其間有次因為同事放假，佢幫手報咗一陣下午嘅新聞，事後竟然都俾新聞總監袁志偉詐型，搞到冇人敢再安排佢喺黃金時間「亮相」。可能因為做到冇晒癮，據知紫盈BB已經遞信劈炮，11月4日正式離職，暫時仲未搵到工。
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇：
http://bit.ly/appletalk24