曾因受賄入獄嘅麥記前一哥劉士盛上月加盟味千（538）做營運總裁（COO），本來冇乜特別，係人都有改過自身嘅機會，但味千第一天公佈任命時，冇講清楚呢位就係曾入獄嘅劉士盛，翌日先澄清係佢。股壇長毛David Webb噚日撰文講番呢件事，仲質疑味千披露劉士盛嘅學歷堅定流。
Webb翻查當年官司判辭，提到劉士盛曾於美國接受專上教育，但冇完成課程，同味千話佢「畢業於加州理工學院」有出入。
Webb又指，味千話劉士盛「已妥為完成刑期，並於2011年年中前後被釋放」，意思好似係劉嘅刑期只得兩年。實情係劉士盛2009年被重判入獄4年零3個月，照計刑期至今年7月中。講來講去，Webb應該不滿味千喺聘請劉士盛一事上，講到唔清唔楚。
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24