硬仗接連失利，還慘遭「嘈炒的鄰居」蹂躪，莫耶斯被炒賠率急升，甚至已有球迷高呼：「換領隊啦！」在討論莫帥炒得未前，先講首位被炒英超領隊迪肯尼奧。新特蘭上季危急存亡之秋，在多方反對下力排眾議請來狂人；今季讓狂人豪花近2,000萬鎊狂掃14新兵，竟短短5周內又炒咗佢。雖有傳狂人確係控制狂，連球員食茄汁、用手機、可樂加冰都要禁，導致將帥不和；但成件事新特蘭管理層才是最大問題：一早講明佢係儍嘅！仲請佢？請咗佢，又唔信佢？
至於莫耶斯，其履歷亦眾所周知。開季死亡賽程真係死晒咁滯，我會借用黃子華金句：「好出奇呀？係咁㗎啦！」逐個人腳秤，曼聯仍冇得同曼城比：尹佩斯受傷後，前場正選只有朗尼，後防只有迪基亞、維迪及艾拉稱得上世界級；面對曼城個個頂級進攻球員，點頂？上季費Sir在位，接近相同人腳，戰曼城可1勝1負，全因費Sir獨有令球員發揮「1+1大於2」的能力。莫耶斯冇咁嘅能力？「好出奇呀？係咁㗎啦！」
要炒人，因表現不符預期；咁如果降低預期，又點睇？我認為今季曼聯能保住前4、歐聯入到8強，以首季帶隊的莫帥來說，已經達標。未來5場聯賽對手全屬弱旅，憤怒的魔迷可睇定啲先；但今晚對利記的英聯盃，緊接還有聯賽和歐聯，唔留力又死、留力輸波又死，點取捨？你問莫耶斯，佢可能都打緊畀費Sir。
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24