在當前弱勢政府下，訂立相對貧窮線，未見其利，先見其弊。香港人認為自己要與先進工業國睇齊，乃葉公好龍。
當前兩股力量，令全球貧富差距持續擴大，包括強國崛起及全球化，主宰了金融海嘯及之後世界經濟格局。中國晉身世界工廠之後，歐美也走上九十年代香港產業空洞化之路，工作機會流失，惟有靠高增值服務業、火箭工程師創造的投資產品及創意產業，先進工業國製造業時代終結，大量建基於製造業的管理職位也隨之消失，勞動力市場呈兩極化。大家只要問一問屋苑內50、60歲嘅保安員，問佢以前做乜嘢工作？多數係倉務經理、工廠主任。在製造業年代，他們應該屬中產階層內的下層。今時今日，這個階層已經消失，工廠都搬到內地了，又何來倉務經理職位。
欠政治決心 議而不決
如果能參與全球化分工最優勢產業，就會獲得超高回報，香港在全球分工中是國際金融中心，因此任何同金融業高增值部份沾上邊，好似做投資、會計、公司財務，都會有高回報。但這部份也屬全球競爭，香港金融業人才，來自世界各地，不限於本土精英，產業空洞化及階級兩極化，對公共財政產生影響，早在肥彭年代已經完全浮現。其中討論最多、時間最長，是擴闊稅基，香港納入薪俸稅網人口越來越少，政府近十幾年不斷擴張公共開支，那麼錢從何來，當然是靠「地產霸權」，即非經常性收入佔總收入比例持續上升。但問題早已睇到，為何長期議而不決呢？就是欠政治決心。
平時好景，樓股暢旺，賣地及印花稅收入源源不絕，公共財政狀況良好，盈餘創新高，又點會支持再開拓稅源，例如VAT銷售稅，曾蔭權年代便是如此。到樓市仆直，政府非經常收入暴跌，但開支無法收縮，赤字連連，失業高企，那時再開徵新稅，無疑係政治自殺，老董年代財爺阿松滅赤過急，結果引發民怨，自己也賠上政治生命。
自05年樓市正式復蘇起，呢七、八年來大家已忘記老董赤字痛苦教訓，曾俊華一直謹守政務官保守哲學，對擴張經常性開支好抗拒，只願意用短期派錢方法，將非經常收入增加帶來財政盈餘，派番畀基層，呢種保守原則與大有為之梁振英民生政綱唔係好夾。梁大有為第一定係訂立貧窮線，第二步就改革福利政策，而後果必然係經常性開支擴張。但佢另一邊要壓抑樓價、令年輕人有力上車，成個政府除咗搶地起公屋，乜嘢都唔理，經濟增長動力何在？後果就係政府非經常收入下降，你話條數點計？
最近梁錦松在訪問中，承認當日滅赤過急，香港正進入新一輪擴張開支周期，但時機錯晒，將會遇上經濟下調，呢次公共財政危機，可能比阿松當日更加大劑。梁之胡亂施政，最終邊個埋單？
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange