【灣仔】現年42歲嘅洪欣09年同後生11年嘅內地演員張丹峰結婚，而佢同前男友莫少聰所生嘅囝囝張浩鋒（前名莫鎬廉）亦跟繼父一齊生活。一直有指洪欣婚後努力造人想再追多個，結果佢終償心願，今年7月有讀者向本報爆料指洪欣懷孕14周，估計𠵱家洪欣已經懷孕5個幾月。早前見到洪欣孖住張丹峰去咗灣仔開餐，着住平底鞋嘅洪欣唔止肚凸凸，而且胃口非常好，孕味甚濃。
老公服侍周到
當日下午3點幾，戴住黑超嘅洪欣同老公坐的士到灣仔駱克道，好體貼嘅張丹峰落車之後，即刻幫老婆做阿四攞住個鮮黃色手袋，非常溫馨。至於着住鬆身衫嘅洪欣好似小鳥依人咁挽住老公臂彎漫步街頭。兩公婆先到一間潮州粉麵店開餐，原來肚餓嘅係洪欣，佢喺店內不停狂食魚蛋粉，胃口好好，老公只係陪坐。
食飽飽出到門口，睇嚟已見肚嘅洪欣仲意猶未盡攞住袋炸魚皮外賣當薯片食，大肚婆果然零舍擦得。之後張丹峰去便利店買飲品畀老婆，你一啖時我又一啖，幾煙韌。跟住洪欣陪番老公去睇潛水用品，最後張丹峰買咗對潛水手套就走人。
採訪、攝影：梁繼光、羅德光
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇：
http://bit.ly/appletalk24