一班副局長同政治助理噚日喺政制及內地事務局局長譚志源帶領下訪京。有冇發現，訪問團中唔見教育局副局長楊潤雄，唔係咁唔畀面北大人呀？原來楊潤雄唔跟大隊去面聖，係有苦衷㗎，事關佢嘅局長，即係教育局局長吳得掂，又放假……呀，唔係，係外訪至真，楊潤雄要留港做署任局長。
教育局噚日公佈，吳得掂今日啟程去上海，然後再去北京同天津。喺上海「疏乎」期間，佢會同上海市教育委員會代表會面，又會參觀上海中學同復旦大學；周四傍晚就要轉飛北京，事關佢肩負「紅色事業」，要率領成百人嘅香港教育界國慶訪京暨專業交流團，去京城參與交流活動，亦會同國家教育部同其他官員會面，外遊到……吖，又講錯，外訪到10月1號返港至真。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange